Ille mi par esse deo videtur,

Ille, si fas est, superare divos,

Qui sedens adversus identitem te

Spectat et audit

Dulce ridentem, misero quod omnis

Eripit sensus mihi ; nam simul te

Lesbia, aspexi, nihil est super mi,

Vocis in ore,

Lingua sed torpet, tenuis sub artus

Flamma demanat, sonitu suopte

Tintinant aures, gemina teguntur

Lumina nocte.

Otium, Catulle, tibi molestum est ;

Otio exultas nimiumque gestis.

Otium et reges prius et beatas

perdidit urbes.

Catulle